स्मार्टफोन वाल स्यैणी

पहाडक एक गौं .. कुछ स्यैणि ब्याल बखत इवनिंग वौक में रोड पनलै घुमण लागि रयी . कुछ बुड बाडि ले जांठ पकडिवेर लच्यूं लच्यूं कैबेर घुमण लागरीन .
अचानक स्यैणिनैकि बातचीत हुण लागी -
हवे परुलि ईजा , सलमान कैं पांच सालैकि सजा हैगे बल .
परुलि क ईज - अरे ! कब भै सजा . हमर डिस टीवी रिचार्ज खतम हैरौ .
सरुलि क ईज - हाय . त्वील ह्वट्सऐप में नि देखो . मैलि दोफरी में ' माडर्न घसारी ग्रुप ' में फोटो दगाड डालि राखछी .
परुलि क ईज - अरे यार पोरु बेई ग्वैटन जाण में फेसबुक में गुड मार्निग मैसेज भेजण लागि रौछ्यूं . तो हाथ बटी स्मार्टफोन घुरी पडौ कौ .. टच टुटि गो .  परु क बाबु फोन कैं बागसेर देखूण जैरैछी . टच तो नि मिल . वां जैबेर शराबैलि खुद टच हैबेर घर पुजी ब्याल बखत और वाटपन कती लोटीण लफाईण हुन्याल आपुण मूखक टच जै फोडि लाईं . आब मेर फोन बिना गावगाव ऐरै . बेई बटी आपुणि बैणि और भौजि क दगाड ले चैटिंग नि भै .
सरुलि क ईज - पैं ज्यादे तो नि लागि रय परु वा क बौज्यू कैं ?
परुलि क ईज - लागि रै हुनेलि यार .. मैं तो परेशान हैगेयूं . बेलियै फौल लगैबेर नई साडि तैयार करि राखछी . वीक दगाडक बिलौज ले सिलवै हालछी . सोचि राखछी नई साडि पैरिबेर सैल्फी खैचुल और फेसबुक में प्रोफाइल पिक अपडेट करुल कैबेर .. पर कि करूं फोनैलि ध्वाक दिदे ऐन टैम पर . ह्वट्सऐपैकि डी पी ले द्वि हफ्त पुराणि हैगे . मैंस ले सोचाल मेकैं यो गंवाडि छ कैबेर .
( बीच में आब गोबिन्दी और लता ले ऐ गेयी )
गोबिन्दी - हाय के हैगो परुलि कि मम्मी ..??
परुलि कि ईज - - के बतूं यार . डिमाँक खराब हैगो . फोन क टच टुटि गो .
सरुलि क ईज - परेशानी कि बात तो भयी . बेचारि डी पी ले चेन्ज नि कर सकणै फेसबुक में .
लता - अरे दीदी ! तुम यो सरुलि क मम्मी क फेसबुक में आपुणि आई डी खोलो पिक चेन्ज करि दिओ .
गोबिन्दी - लता तु नान्तिन्योई वालि फसक नि कर . पिक चेन्ज करि बात जब लोग बागनाक . ब्यूटीफूल . ओसाम जास के कौमेन्ट आल तो के कूनी उनर जुबाब को द्योल .
परुलि क ईज - होय गोबिन्दी ठीक कूण लागि रै . समाज में रैबेर समाजक जस करण पडनेर भै . कमेन्टनाक रिप्लाई तो थैंक्स वगैरह कूण भय . नति मैंस के कि कौल . घमण्डी हैगे नि कै देला .
लता - अरे दीदी . आज फोटो चेन्ज करो . भोल दुबार कैकै फोन में आई डी लोगिन करिबेर लास्ट में थैंक्स टू आल करि दिया . सिम्पल
सरुलि क ईज - तकैं थैंक्स टू आल लेखण कां उनेर भै . तकैं सिरफ फोटो बदलण और कमेन्ट में थैंक्स लेखण सिखै राखौ परुवा क बौज्यु लि .
( सबनक खितखिताट )
परुलि क ईज - खिचर्योलि नि करो रे . .. होय . तुम जै बड होशियार छा . तौ गोबिन्दी एक फोन मैल हैगो कैबेर नौल जैबेर सर्फ में ध्वेबेर लिऐ . .. बात करण लागि रै
(सबनक बाकि खितखिताट )
गोबिन्दी - तु तो बडी ऐरैछी .. फोन जब डबल डालण छी तो त्वीलि फोनक ढक्कन खोलिबेर वीक भितर पचासक नोट डालि दे .
( सबनक खित खिताट )
सरुलिक ईज - यार हाल्ल गुल्ल नि करो . मेर उसीके गावगाव ऐरै तुमार खेल हैरीन .
( तब तक फसक करन करनै द्वि बुड ले ऐ गे .)
धर्मानन्द ज्यू - किलै रे नानतिनो कि पडि रौ खितखिताट -
परुलि क ईज - के नै बुबोज्यू .. तसीके फसकन लागि रयां
( तब तक दुसार बुड ग्यान चन्द्र ज्यु फोन निकालि बेर फोटो खीचण  बैठ गे )
ग्यानचन्द्र ज्यू - अरे यो फोटो आब हमर ह्वट्सऐप ग्रुप ' पारा बाखई क बुड ' में डालि जाल . दुल्हैणी जरा मुस्कराये हां ...
......खच्चैक ..... यो ..  हैगो ...
( आब स्यैणि उथकै बाट् लागि गे . बुड दुसरि तरफ )
सरुलि क ईज - हर बखत फोन में लागि रूनी तौ बुड ले .. दिन भर चाड प्वाथ ढुंग पाथरनाक फोटो खीचबेर फेसबुक में डालनी . कमेन्ट नि करो तो ब्याल बखत कूनी किलै ब्वारी त्वीलि मेरि आज फोटो नि देखी .... लाइक कमेन्ट के नि कर ..
लता - मैलि तो तौ बुब ब्लाक मारि राखीं ..
गोबिन्दी - अरे लता मेकैं ले आपुण ग्रुप ' आजकला नई ब्वारि ' में एड करि दिये रे .
लता - रूण दिओ .. फिर तुम कौल क्याप्प मेसेज भेजनी कैबेर . मैंसन में नाम धरछा . तुम पुराण जमानाक तुमार विचार पुराण
गोबिन्दी - पैं उस मैसेज किलै भेजछा . भीतर हमार नानतिन ले मैसेज खोलणी हैगेई ... भल लागछै .
लता - पैं कैल कौ तुमन हूं हमार दगाड जुडो . ..  तुम ' बुढापा बज्यूण हैजो ' ग्रुप बणाओ आपुण लिजी . वैं करिया सत्संग
गोबिन्दी - बणै ल्यून आपुण ग्रुप ले . ज्यादा स्माट नि बण .. ओच्छी रनै ..
लता - तुम ओच्छी .
गोबिन्दी - तु ओच्छी .. तेरि सास ओच्छी .
लता - तुमार च्याल ब्वारी ओच्छी .
गोबिन्दी - जो फोन पर तदुक शान देखूंडछी उ  हैंग हैजौ .
परुलि क ईज - तेर फोनैकि बैटरी फुलि जौ .
सरुलि क ईज - तुमर फोन में वायरस ऐजौ .. ऐ भगवान कबै ठीक ले जन हौ .
लता - तुमार फोन में आउटगोइंग बन्द हैजौ .
(आब हकाहाक चूटाचूट )
तेर फोन मे ..... तुमार फोन में ..  तेर दुल्हौ फोन ले फुटि जौ ...  तेर सौरक फौन ले हरै जौ .....
(परदा गिरता है )