अध्यक्ष सैप

सोनियां ज्यू घर में आज कौतिक जस हई भै . सब गौं पना क स्यैणि भलि भट्यूणा लिजी आई भै . प्रियंका सबन कैं पिठ्या लगूण लागि भै . अम्बिका सोनी गूड बाटण लागि भै . स्यैणि भल भै हो प्रियंका ईजा तुमर च्योल अध्यक्ष बण गो कूण लागि भै . दगाडै तुमरि तबियत कसि छ आब कैबेर हालचाल ले पुछण लागि भ्या ..
चाहा पाणी क इन्तजाम में अहमद पटेल ज्यू लागि भै . राज बब्बर सैप नमकीनाक पुडि फाडिबेर कागजाक प्लेट में डालण लागि भै .
बुडी बुडी जस स्यैणिनाक लिजी शीला दीक्षित ज्यू सिगल पू पकूण में लागि भै . रणजीत सिंह सुरजेवाला ज्यू चाहा बाटण में लागि भै .
राहुल ज्यू एक जाग कुरसी में बैठिबेर लोगन छैं बधाई लिण लीगि भै. उनार दगाड सचिन पायलट और जिंदल सैप ले बैठी भ्या . राहुल ज्यूक क्वे खुट छूवणाय क्वे नमस्कार कूणाय . राहुल ज्यू ब्या दिनाक बरै क चारी तन बेर मन्द मन्द मुस्कराण लागि भाय .एक किनार लै मनमोहन ज्यू ले गजबजी बेर जास ढाड हई भ्या . कैलि कुरसी दी और कौय कि यमैं बैठ जाओ . मनमोहन ज्यू लि सोनिया ज्यू क उज्याण चाय और वां बटी के इशार जस नि आय तो ठाडै रूण में भलाई जस चितै .
गौं कि एक स्यैणि सोनिया ज्यू छैं कूण लागि - किलै हो प्रियंका ईजा ! आब तो तुमर च्योल अध्यक्ष ले बण गो आब कति भली ब्योलि चैबेर तैक खुट ले अल्ज्यै दिना .
सोनिया - होय तसै सोचण रयूं . एक काम तो हैगो . तुमर च्योल के नि करन कूंछीं . आब मैलि तकें बिधिवत अध्यक्ष बणै हालौ . आब ब्या ले करि द्यूल .
स्यैणि - होय ठीक सोचणछा . कति क्वे चेलि देखि राखछी ?
सोनिया - कतु चेल्ली देखन . कति तैक मन नि आय कति तौ चेल्लिनाक मन नि आय . कति चिन्ह स्वाम्य नि भय .. कति के कति के .. बड जन्जालि ग्रहौ छ तैक .
स्यैणि - कति दिग्बिजय ज्यू छैं कूना धें .
सोनिया - बज्जर पाडूं .. उनार तो आपुणां रण्याट पुर नि है सक रय .
स्यैणि - राज बब्बर ज्यू छैं कूना धें . फिल्म लाइन वाल भ्या . कती हिरोइन वीरोइन दगाडै करै दिन
सोनिया - कौ उनन छैं ले . उ आलिया भट्ट क चिन्ह लिबेर ले आइन . पर महेश भट्ट ज्यु लि मना करि दे . कूण लागि बल द्विये एकनसै जास हैजाल कैबेर .. मेकें ले उनरि बात ठीक लागी . मैं सोचण लागि रयूं खूब चन्ठ जसि ब्वारि आली तो तकैं भली के सभालैलि .
स्यैणि - होय ठीकै कूणैछा .
( तब तक भ्यैर ढोल वाल ले ऐग्याय . उनैलि छलरि बाज बजूण शुरू करि दी . )
कुछ पार्टी वाल नाचण बैठ गे .
राहुल ज्यू अचानक एक कमर में न्है ग्याय और टीवी में आपुण मनपसन्द चैनल देखण बैठ ग्याय . सोनिया ज्यू लि राहुल ज्यू कैं आँख देखाय . पर राहुल ज्यू क पुर ध्यान टी वी में भै और उनैलि चाइयक नि चायी करि दी . फिर सोनिया ज्यू लि प्रियंका कें हाथक कुहुन मारिबेर इशार कर और प्रियंका राहुलाक कमर में गे और कूण लागि -
भय्या त्वेकैं ईज बुलूणै .
राहुल - अल्लै ऐगेयूं कै दिये .. देख पें दिद्दी तू ले कतु भल उणौ टी वी में . देख पें उल्लै छोटा भीम ले आल .
प्रियंका - भूला तु आब तौ टी वी देखण बन्द कर . आब तु अध्यक्ष छै .
राहुल - ऐ गेयू अल्लै ..
प्रियंका - मेहमान ऐरीन ..उ .. किकौल .
राहुल - दिदी तू बैठ जा नै थ्वाड देर मेहमानाक दगाड और भिन्यू न कैं बैठै दी .
प्रियंका - त्यार भिन्ज्यू नै ऐराय . आजकल घर बटी भ्यैर कम निकलनन .भूली तस नै कर .. हिट धें . हमार मेहमान तो जि ले कराल .. उ मोदी राठ कि कौल .. उनन कैं तेरि काटणि करणक न्यैर चैं .. त्वेकि पार्टी में नि देखाल तो क्याप क्याप कूण कैठाल .. कसि कसि बात कूण बैठाल . फिर हमरि तरफ बटी उनार जवाब दिणी ले क्वे नहाति ..
राहुल - होय ठीक कौ दिद्दी .. भौतै बुलानन तौ मोदी राठ .. तदुक कां बटी लूनन तौ लोग फसक .. म्यार तो के समझै में नै उन तनैरि बात .
प्रियंका - तू ले बुलालै भूला आब .. आब अध्यक्ष बण गोछै . त्वेकै ले सीखण पडौल .. तौ मोदी कैं हटूण ले छ त्वील .
राहुल - दिद्दी ... आज तास फसक नि कर .. मेकैं डर लागैं ... और दिद्दी .. उत्तराखंड बटी हरीश रावत ज्यू ऐरीन बल .. बाल मिठ्ठै लै रै हुन्याल .. एक चौकलेट और माऊ पातैकि मिठ्ठै दे .. मेकैं भूक लागि रै .
प्रियंका - ओं .... लि आछी बाल मिठ्ठै .. आब मुख्यमन्त्री ज कि छन रावत ज्यू जो मिठ्ठै लाल .. एक दर्जन क्याव लिबेर पुजि रयी .. आब तु बहानेबाजी नि कर फटाफट भ्यैर आ ..
राहुल - होय दिद्दी ऐ गेयूं ..
(भ्यैर डी जे में गीत बजण लागि भै - साला में तो साहब बन गया .. ये सूट मेरा देखो ... ये बूट मेरा देखो ..... )
विनोद पन्त खन्तोली ..